المجتمع

سهوكة بنات

يعني اية سهوكة بنات………!!

Advertisement

 

كلمة بنسمعها كتير جدا وبنقول دى بنت بتتسهوك كلغة للمصريين وحسب كل دولة او لغة بتتنطق بطريقة معينة او بالفاظ أخرى .هى صفة منسوبه للمرأه ويقال انها متسهوكه ، بكسر الميم.

Advertisement

وكأن البنت عشان تبان انها كيوت ومن ناس وعيلة ودلوعة لازم تتسهوّك وتعيش الدور اوى وخاصة قدام الولاد ، يا خراششششى .. دا البنات اللى من النوع ده المفروض يتقلبوا دباديب من كتر السهوّكه وعرايس باربي. وتلاقى البت من دول يا اخويا تقول ( بابى و مامى ) ، وتلاقيها اصلا فى البيت صوتها عامل زى الجعوره وعماله تشخط وتزعق واه بقى لما بتبقى جعانه تبقى حاسس أنك لو ادامها ممكن تأكلك وطبعا بتضرب محشى وفول فى الخباثة ، ولما حد يسألها فطرتى ايه تقوله ( نسكافيه ومولتو ) ، وهى فى البيت بتنزل لغ عمال على بطال لحد ما توصل لمستوى سيد قشطة . ولو معزومة بره ولا حاجه يدوب الشوكة او المعلقة بتتغمس فى الاكل بس وتطلع مش عليها ولا اى حاجه يدوب تمصها بس عشان تبينلك انها بنت ناس . ولما تأكل يدوب تفتح ربع بوق كده عشان متتفضحش ادام الا قاعدين معاها وتوقع على نفسها .

السهوكة:

هى التحايل فى طلب شىء مع جذب التعاطف من الاخريين
تستخدمها البنت فى حاله احتياجها لتلبيه اى طلب تطلبة من الرجل ، وطلب الشىء ده بطريقه تفوح منها رائحة الدلع الشديد ..الشدييييد اووووى هى دى سهوكة بنات……

مع انها تحتوى على إلحاح اشد ،ولو غفلت عين الرجل عن الدلع  (سهوكة)
هيلاقيها متختلفش كتيرعن الاخ اللى بيبيع ورد على الكورنيش وانت قاعد مع خطيبتك ،ويجى يفرض عليك انك تشترى منه بالعافيه
ومضطر طبعا انك تشترى علشان تخلص من زنه .. دا نفس الحال فى سهوكة البنت سواء بتطلب من خطيبها او حبيبها او من جوزها اى شىء
زى تغير العربيه .. خاتم او كوليه عجبها وعاوزاه عزومه او فستان …. الخ. والمشترك بينها وبين الراجل دا تلبيه الطلب
لان فى الحالتيين هتطلع اللى فى جيبك، بس المرادى هتبقى راضى وهتبقى على قلبك زى العسل او العثلن ودا بسبب نسبة السهوكه المضافه اللى طريقة الطلب

سهوكة بنات………!!
ولســـــــــــه….

هى طبعا اول ماتسمع الكلمتين دول لازم تقوم بدورها وتفضل تعييييييط وهو طبعا اول مايشوف كده يقعد ينفخ واوووووووووف مش هنخلص من ام اليوم الا مش هيعدى دا طب معلش ياقلبى حقك عليا وهو فى باله ياادى ام اليوم الغم من اولها اتفتحت مش هتتقفل ولا كمان ساعتين انا غلطان انا الا جبته لنفسى ….. خلاص يامعلمه خلاص يابرنس طب ايه يرضيكى انا ابن تييييييت انى زعقتلك وهكذااااا…

اشكال السهوكة:

السهوكه ليها طرق كتير جدا منها بالكلام او الافعال او حركات الجسم

مثلا خطيبتك او حبيبتك عاوزه حاجه منك وعارفه طبعا انك ممكن ترفض

اول حاجه هتبدا كلامها بــ .. حبيبى انا عاوزه… وخد عندك بقى
*حبيبى اللى فى الاول ليها مفعول اكيد جدا فى تهدية اعصاب الشخص المتلقى وتهدى من روعة ما يلحقها من طلبات
او حبيبى انا عاوزه اطلب منك طلب بس انا خايفه
*تأثير كلمة حبيبى هنا مش كبير .. التاثير هنا هيبقى لكلمة انا خايفه (سهوكة بنات)
التى من شائنها رفع دقات القلب وتدفق الدم وصغر حجم بوء بوء العين

مع زيادة منسوب الشهامه والحب – وحط تحت كلمة الشهامه والحب خطين – ان ازاى حبيبى وخايفه

وتنهى طلبها بكلمات تعاطفيه تحسسك بيها بمدى ضعفها ادامك …. يا ضنايا ( وهنا سهوكة البنت بتشتغل) والغلبان يبدأ يقتنع ويطلع الا فى جيبه او يقولها الا انتى عوزاه ياروحى ويتعاطف معاها.
زى .. وحياتى عندك يا حبيبى
مش عاوزه اكون حمل كبير عليك بطلباتى
لو مش هتقدر عادى يا حبيبى انا ممكن استحمل
سيادة الراجل بقى ينط فيه عرق الشهامه والرجوله والجناحات تتفرد ويعمل نفسه سوبر مان

والملاحظ ان الرد الوحيد عن كل الطلبات دى بتبقى..
من عنيا يا حبيبتى طلباتك كلها اوامر.. انتى اهم حاجه فى حياتى ولازم اعملك كل الا تطلبيه
تك ستين خيبه

وهنا السؤال

فى تلبية الطلب دا بعد السهوكه طبعا
ومع ان كل الرجاله اكيد عارفيين الكلام اللى انا قولتله ده
وعارفين باقى الطرق

هل هو ضعف منه ؟؟
او بانه خلاص لبس الطربوش او اتضحك عليه بالكلمتيين دوول؟؟
يعنى اتاكل بعقله حلاوة

ولا من حبه ليها وانه مش عاوز يرفضلها طلب

ردىَ على السؤال فى كلمة واحده بس

سهوكة بنات………!!ان كيدهن عظيم …

 

سهوكة بنات

يا هانم يا متسهوّكه انتى وهى .. بصى فى المرايه الصبح اول ما تصحى وانتى شعرك منكوش وشوفى شكلك عامل ازاى ، وما تنسيش وحياة مامتك تبصى على الشنب اللى فى وشك اللى شبه شنب العيال بتوع اعدادى اللى لسه بالغين جديد ، اتلمى بقى وعيشى عيشة اهلك ، وعلى فكرة بقى انتى عمرك ما كنتى كيوت ولا سهوّكتك هتخليكى كيوت ابدا ابدا ، وعشان تعرف البت دى متسوّكه ولا لأ .. هتلاقى الأكونت بتاعها عَ الفيس مليان كلام رومانسيه وحب وصور بنات اجانب ، قال يعنى هى كده بتبعد العين عنها وبتخلى الناس تتوهم ان البت دى من الأخر ومستواها عالى .
ع َ الفيس بقى عمرك ما هتلاقى البت المسهوّكه دى حاطه صورتها ، لأنها لو حطت صورتها .. مش بعيد الفيس بوك يقفلها الاكونت بتاعها ويرميها رمية الكلاب بره الفيس خالص ، لأن محتوى الصورة هيكون غير آمن وبيتسبب فى ارهاب المواطنين ، والبنات دول لازم يتحطوا مع بعض فى مكان لوحدهم ونحاول نعالجهم عشان ما يأذوش حد غيرهم ، لأن الناس مش ناقصه سهوّكة ومياصة ومُحن .. كفايه اللى احنا فيه لأن المرارة خلاص مبقيتش مستحمله .
اللى يغيظك بقى اكتر لما تشوفها ماشيه فى الشارع وبتحاول تعمل فيها عارضة ازياء بيبقى شكلها تييييت اخر حاجه ، والمشكله بقى الأكبر واللى تخلّى عند الواحد اكتئاب من النوع التقيل لما تلاقى الواد صاحبها مصدق ان حضرتها دلوعه وبنت ناس عاليين اوى وانها رقيقه جدا بطبعها ، يا ابنى دانت لو رجعت لتاريخها هتلاقى مليان حاجات ضد الرقة تماما ، والرقه لو بتتكلم كانت قالت ارحمونى منها بعلو الصوت ، ده اللى بتعمله البت اللى من النوع ده لايطلق عليه سوى كلمة مُحن ، ( توب علينا يا رب من مُحن وسهوّكة البنات ).

 

سهوكة بنات

 

البنت مش سهوكة ….خليكي على طبيعتك

مبدئياً السهوكة لا تساوي بأي شكل من الأشكال الرقة

وبالتالي ممكن نعرّف السهوكة على أنها مياعة، أو دلع فارغ

ممكن نقول عليها رقة مصطنعة أو عوجان لسان من غير لازمة

طيب ايه المطلوب من البنت الا بتعمل كده؟؟؟

ببساطه انها تبقى إنسان طبيعي عادي بيتكلم ويتصرف زي أي بني آدم طبيعي على وجه الكرة الأرضية

البنت ممكن تبقى إنسان مستقل …

ممكن تشيل حاجة يزيد وزنها عن المقص من غير ما تقول: “آي تقيلة أوي يا حمادة..ممكن تشيلها أنت ”

ممكن تتكلم بطريقة طبيعية من غير ما تِدخل بين كل كلمة وكلمة، كلمة بالإنجلش لمجرد عوجان اللسان

ممكن تضحك في الشات من غير ماتعمل (هههههههههههههههه أو hhhhhhhhhh)  (على حسب ثقافتها) لمدة نص ساعة

ممكن تلاقي كومنتات كتير تقولها أفضل من لووووووووووووووووووووول

ممكن ضوافيرها توجعها من غير ما تقول ” مامي ضوافريني بتوجعني”

ممكن تتصور من غير ما تضرب البووز إياه فى السيلفى ( لابوز بطه ولا بوز ارنب)

وممكن أيضا تلاقي أماكن كتيرة تتصور فيها أفضل من مرايات حمامات مؤمن وماكدونالدز وكنتاكي وسيلانترو …. إلخ إلخ

و بالتالي الحملة دي مش ضد أن البنت تبقى كائن رقيق ، لطيف و هادي ..

لكنها ضد أن الرقة والهدوء تتساوي بالدلع الفارغ ، والمياعة والرقة المصطنعة لدرجة تخلي البنت كائن مستفز يستحيل التواجد معاه في مكان واحد ..

**ملحوظة مهمه جدااا:

السهوكة تُطَبق بشكل يومي في مختلف كليات ونوادي وكافيهات (… ألخ ألخ)

العاصمة وما يجاورها من محافظات وعلى القاطنين خارجها مراعاة فروق التوقيت

وبالتالي لمزيد من التوضيح يمكنك أن تلاحظ كل تلك الأفعال السهوكية بنفسك ..

واحب اضيف من عندي ان خفة الدم او محاولة الكتابة الساخرة عمرها ما كانت

بتغيير الكلمات زي أوختشي او كصة قصيرة او عثل عثل أو شئ

لايصدكه عكلى  او هذه الالفاظ الركيكة …. وكمان على فكرة السهوكة

او الموضوع مش للبنات بس فى شباب كده بردو

Advertisement
سهوكة بنات
4 (80%) 1 vote